କଳାହାଣ୍ଡି, ୧୮ ସେପ୍ଟେମ୍ବର ୨୦୨୬ (ସିଂହନାଦ/SIMHANAAD): କଳାହାଣ୍ଡି ଜିଲ୍ଲାର ବିଭିନ୍ନ ପୁଲିସ ଥାନାରେ ମୋଟ ୬୮ଟି ମଞ୍ଜୁରୀପ୍ରାପ୍ତ ପଦ ଖାଲି ଥିବା ଆରଟିଆଇ ତଥ୍ୟରୁ ଜଣାପଡ଼ିଛି। ଏଥିରେ ୧୪ଟି ଏସ୍ଆଇ, ୨୮ଟି ଏଏସ୍ଆଇ ଓ ୨୬ଟି କନଷ୍ଟେବଲ ପଦ ରହିଛି। ବିଶେଷକରି ଦୁର୍ଗମ ଅଞ୍ଚଳର ଥାନାଗୁଡ଼ିକରେ ଏଭଳି ଜନବଳ ଅଭାବ ଆଇନଶୃଙ୍ଖଳା ପରିଚାଳନାକୁ ନେଇ ପ୍ରଶ୍ନ ଉଠାଇଛି।
ଆରଟିଆଇ ତଥ୍ୟ ଅନୁସାରେ, ଲାଞ୍ଜିଗଡ଼ ଥାନାରେ ମଞ୍ଜୁରୀପ୍ରାପ୍ତ ୮ଟି ଏସ୍ଆଇ ପଦ ମଧ୍ୟରୁ ମାତ୍ର ଜଣେ ଏସ୍ଆଇ କାର୍ଯ୍ୟରତ ଅଛନ୍ତି। ସେହିପରି ଏଏସ୍ଆଇ ଓ କନଷ୍ଟେବଲ ପଦରେ ମଧ୍ୟ ଖାଲି ରହିଛି।
ବିଜେପୁର ଥାନାରେ ୩ଟି ଏସ୍ଆଇ ଓ ୧୧ଟି କନଷ୍ଟେବଲ ପଦ ଖାଲି ଥିବା ତଥ୍ୟ ସାମ୍ନାକୁ ଆସିଛି। ଏମ୍.ରାମପୁର, ବିଶ୍ୱନାଥପୁର, କାର୍ଲାପାଟ ଓ ଥୁଆମୂଳ ରାମପୁର ଭଳି ଅଞ୍ଚଳରେ ମଧ୍ୟ ପୁଲିସ ଜନବଳ ସ୍ଥିତିକୁ ନେଇ ଚିନ୍ତା ପ୍ରକାଶ ପାଇଛି।
ଅନ୍ୟପଟେ ଭବାନୀପାଟଣା ଟାଉନ୍, ଭବାନୀପାଟଣା ସଦର, ଜୁନାଗଡ଼, ଧର୍ମଗଡ଼ ଓ କେସିଙ୍ଗା ଭଳି କେତେକ ଥାନାରେ କିଛି ପଦରେ ମଞ୍ଜୁରୀ ସଂଖ୍ୟାଠାରୁ ଅଧିକ କର୍ମଚାରୀ ଥିବା ତଥ୍ୟ ମିଳିଛି।
କଳାହାଣ୍ଡି ଏସ୍ପି ନାଗରାଜ ଦେବରକୋଣ୍ଡାଙ୍କ କହିବା ଅନୁସାରେ, ଜିଲ୍ଲାର ମଞ୍ଜୁରୀପ୍ରାପ୍ତ ପୁଲିସ ପଦର ପ୍ରାୟ ୫୦ ପ୍ରତିଶତ ଖାଲି ରହିଛି। ଉପଲବ୍ଧ ଜନବଳକୁ ଅଞ୍ଚଳର ଆବଶ୍ୟକତା ଅନୁଯାୟୀ ବିନ୍ୟାସ କରାଯାଉଛି ବୋଲି ସେ କହିଛନ୍ତି।
ତେବେ ଦୁର୍ଗମ ଓ ଆଦିବାସୀ ଅଧ୍ୟୁଷିତ ଅଞ୍ଚଳରେ ପୁଲିସ ଜନବଳ ଅଭାବ ଦୀର୍ଘଦିନ ଧରି ରହିବା ନେଇ ପ୍ରଶ୍ନ ଉଠିଛି। ଖାଲି ପଦଗୁଡ଼ିକୁ ଶୀଘ୍ର ପୂରଣ କରି ଥାନାଗୁଡ଼ିକରେ ଆବଶ୍ୟକ ଜନବଳ ଯୋଗାଇବାକୁ ଦାବି ଉଠୁଛି।
Thanks for reading: ୬୮ ପୁଲିସ ପଦ ଖାଲି, କଳାହାଣ୍ଡିର ଦୁର୍ଗମ ଅଞ୍ଚଳରେ ଜନବଳ ସଙ୍କଟ, Sorry, my English is bad:)