ନିର୍ବାଚନ ଆସିଲେ ପ୍ରତିଶ୍ରୁତିର ବର୍ଷା, ଫିତା କଟା, ଶିଳାନ୍ୟାସ ଓ ବିକାଶର ମହାଗାଥା। ନିର୍ବାଚନ ସରିଗଲେ ସେହି ବିକାଶ ମଣେହୁଏ ଫାଇଲ ଭିତରେ ବିଶ୍ରାମ ନେବାକୁ ଚାଲିଯାଏ। ଜନତା ପଚାରନ୍ତି, "ପ୍ରକଳ୍ପ କେଉଁଠି?" ଉତ୍ତର ଆସେ—"ଅପେକ୍ଷା କରନ୍ତୁ, ପ୍ରକ୍ରିୟା ଚାଲିଛି।"
ଯୁବକ ଚାକିରି ପାଇଁ ରାଜ୍ୟ ବାହାରେ, ଚାଷୀ ଫସଲର ଦାମ ପାଇଁ ଚିନ୍ତିତ, ରୋଗୀ ଚିକିତ୍ସା ପାଇଁ ହଇରାଣ, ଆଉ ସାଧାରଣ ଲୋକ ସରକାରୀ କାର୍ଯ୍ୟାଳୟର ଦ୍ୱାରେ ଦ୍ୱାରେ ଘୁରୁଛନ୍ତି। କିନ୍ତୁ ସରକାରୀ ରିପୋର୍ଟରେ ସବୁକିଛି ଚକଚକିଆ!
ଯଦି ପୁରସ୍କାର ମିଳୁଥାନ୍ତା ଆଶ୍ୱାସନ, ଶିଳାନ୍ୟାସ, ଭାଷଣ ଓ ବିଜ୍ଞାପନ ପାଇଁ, ତେବେ କଳାହାଣ୍ଡି ହୁଏତ ବିଶ୍ୱରେ ପ୍ରଥମ ସ୍ଥାନ ଅଧିକାର କରିଥାନ୍ତା। କିନ୍ତୁ ଲୋକଙ୍କ ପ୍ରଶ୍ନ ଆଜି ମଧ୍ୟ ସେଇ—ବିକାଶ କାଗଜରେ, ନା ଲୋକଙ୍କ ଜୀବନରେ?
କଳାହାଣ୍ଡିର ଭାଗ୍ୟ ବଦଳିବ କେବଳ ନୂଆ ସ୍ଲୋଗାନରେ ନୁହେଁ; ବଦଳିବ ସ୍ୱଚ୍ଛ ଶାସନ, ଗୁଣାତ୍ମକ ଶିକ୍ଷା, ଉନ୍ନତ ସ୍ୱାସ୍ଥ୍ୟସେବା, ଶିଳ୍ପାୟନ ଓ ରୋଜଗାର ସୃଷ୍ଟିରେ। ସେଦିନ ବିଶ୍ୱ ଦରବାରରେ କଳାହାଣ୍ଡିର ସ୍ଥାନ କେହି ପଚାରିବେ ନାହିଁ—ବିଶ୍ୱ ନିଜେ କହିବ, "ଏହା ହେଉଛି ପରିବର୍ତ୍ତିତ କଳାହାଣ୍ଡି।"
ସେପର୍ଯ୍ୟନ୍ତ ପ୍ରଶ୍ନ ରହିବ—"ବିଶ୍ୱ ଦରବାରରେ କଳାହାଣ୍ଡି କେତେ ନମ୍ବର?" ନାକି "ପ୍ରତିଶ୍ରୁତିର ତାଲିକାରେ ସବୁବେଳେ ପ୍ରଥମ?"
Thanks for reading: ବିଶ୍ୱ ଦରବାରରେ କଳାହାଣ୍ଡି କେତେ ନମ୍ବର? — ଘୋଷଣାରେ ବିଶ୍ୱବିଜେତା, ବାସ୍ତବରେ ଅପେକ୍ଷାରତ!, Sorry, my English is bad:)