ମାଲକାନଗିରି, ୨୮ ଜୁନ୍: ଓଡ଼ିଶା-ଆନ୍ଧ୍ର ସୀମାନ୍ତବର୍ତ୍ତୀ ମାଲକାନଗିରି ଜିଲ୍ଲାର କାଲିମେଳା ଥାନା ଅଧୀନ ଗୁଣ୍ଠାବେଡ଼ା ଓ କଦମଗୁଡ଼ା ଜଙ୍ଗଲ ଅଞ୍ଚଳରେ ସୁରକ୍ଷା ବାହିନୀ ଏକ ବଡ଼ ସଫଳତା ହାସଲ କରିଛି। ଗୁପ୍ତ ସୂଚନା ଆଧାରରେ ଚାଲିଥିବା ସର୍ଚ୍ଚ ଅପରେସନ୍ ସମୟରେ ମାଓବାଦୀଙ୍କ ଲୁଚାଇ ରଖାଯାଇଥିବା ବହୁ ପରିମାଣର ଅସ୍ତ୍ରଶସ୍ତ୍ର, ବିସ୍ଫୋରକ ଓ ଗୁଳିଗୋଳା ଜବତ କରାଯାଇଛି।
ଜବତ ସାମଗ୍ରୀ ମଧ୍ୟରେ ୨ଟି ସେଲ୍ଫ-ଲୋଡିଂ ରାଇଫଲ (SLR), ୨ଟି ଦେଶୀ ପିସ୍ତଲ, ଏକ IED, କ୍ଲେମୋର ମାଇନ୍, ଗ୍ରେନେଡ୍ ଲଞ୍ଚର, ଗ୍ରେନେଡ୍ ସହ ବିଭିନ୍ନ ପ୍ରକାରର ବିସ୍ଫୋରକ ସାମଗ୍ରୀ ରହିଛି। ଏହାସହ ଅସ୍ତ୍ର ନିର୍ମାଣରେ ବ୍ୟବହୃତ କିଛି ଉପକରଣ ମଧ୍ୟ ଜବତ ହୋଇଛି।
ପୁଲିସର ସୂଚନା ଅନୁସାରେ, ଆତ୍ମସମର୍ପଣ କରିଥିବା ମାଓବାଦୀଙ୍କଠାରୁ ମିଳିଥିବା ତଥ୍ୟ ଆଧାରରେ ଜିଲ୍ଲା ସ୍ୱେଚ୍ଛାସେବୀ ବାହିନୀ (DVF) ଏହି ଅଭିଯାନ ଚଳାଇଥିଲା। ଚଳିତ ଜୁନ୍ ମାସରେ ମାଲକାନଗିରିରେ ଏହା ତୃତୀୟ ବଡ଼ ମାଓବାଦୀ ଅସ୍ତ୍ରଭଣ୍ଡାର ଜବତ ଘଟଣା ବୋଲି ଏସ୍ପି ସୂଚନା ଦେଇଛନ୍ତି।
ଏହି ସଫଳ ଅଭିଯାନ ପରେ ମାଓବାଦୀଙ୍କ କାର୍ଯ୍ୟକଳାପକୁ ବଡ଼ ଧକ୍କା ଲାଗିଥିବାବେଳେ ସୀମାନ୍ତ ଜଙ୍ଗଲ ଅଞ୍ଚଳରେ ସୁରକ୍ଷା ବାହିନୀର କମ୍ବିଂ ଅପରେସନ୍କୁ ଆହୁରି ଜୋରଦାର କରାଯାଇଛି।
Thanks for reading: ମାଲକାନଗିରିରେ ମାଓବାଦୀଙ୍କ ବଡ଼ ଅସ୍ତ୍ରଭଣ୍ଡାର ଜବତ, ସୁରକ୍ଷା ବାହିନୀର ସଫଳ ଚଢ଼ାଉ, Sorry, my English is bad:)