ଭବାନୀପାଟଣା, ୨୨ ଜୁନ:
କଳାହାଣ୍ଡି ଜିଲ୍ଲା ପାଇଁ ସରକାର ପକ୍ଷରୁ ବାରମ୍ବାର ଶତାଧିକ କୋଟି ଟଙ୍କାର ବିକାଶ ପ୍ରକଳ୍ପ ଘୋଷଣା କରାଯାଉଛି। ଚଳିତ ବର୍ଷ ଜାନୁଆରୀରେ ଜିଲ୍ଲାରେ ପ୍ରାୟ ୮୯୧ କୋଟି ଟଙ୍କାର ୩,୬୧୨ଟି ପ୍ରକଳ୍ପର ଶୁଭାରମ୍ଭ ଓ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ଏହା ପୂର୍ବରୁ ମଧ୍ୟ ବିଭିନ୍ନ ସମୟରେ ହଜାର କୋଟି ଟଙ୍କାର ସେଚନ, ସଡ଼କ, ପାନୀୟଜଳ ଓ କୃଷି ପ୍ରକଳ୍ପ ଘୋଷଣା ହୋଇଛି ।
ତେବେ ସାଧାରଣ ଲୋକଙ୍କ ପ୍ରଶ୍ନ ହେଉଛି, ଘୋଷଣା ହେଉଥିବା ପ୍ରକଳ୍ପଗୁଡ଼ିକର ବାସ୍ତବ ଫଳ କେବେ ଦେଖିବାକୁ ମିଳିବ? ଅନେକ ଗ୍ରାମରେ ଆଜି ମଧ୍ୟ ଭଙ୍ଗା ସଡ଼କ, ପାନୀୟଜଳ ସମସ୍ୟା, ସ୍ୱାସ୍ଥ୍ୟ ସେବାର ଅଭାବ ଓ ବେକାରି ଚିନ୍ତାର ବିଷୟ ହୋଇ ରହିଛି।
ସରକାର ବିକାଶର ଲମ୍ବା ତାଲିକା ଦେଉଥିବା ବେଳେ ବିରୋଧୀ ଓ ସାମାଜିକ କର୍ମୀମାନେ କହୁଛନ୍ତି ଯେ, କେବଳ ଶିଳାନ୍ୟାସ ଓ ଘୋଷଣା ନୁହେଁ, ପ୍ରକଳ୍ପର ସମୟବଦ୍ଧ କାର୍ଯ୍ୟକାରିତା ଓ ଗୁଣବତ୍ତା ଉପରେ ନଜର ଦରକାର। ନଚେତ୍ ବିକାଶ କାଗଜପତ୍ର ଓ ସରକାରୀ ବିଜ୍ଞାପନରେ ସୀମିତ ହୋଇ ରହିବ।
ଅନ୍ୟପଟେ ସରକାର କହିଛନ୍ତି ଯେ କଳାହାଣ୍ଡିରେ ସେଚନ, କୃଷି, ଶିଳ୍ପ ଓ ଭିତ୍ତିଭୂମି ବିକାଶକୁ ଗୁରୁତ୍ୱ ଦିଆଯାଇଛି ଏବଂ ପର୍ଯ୍ୟାୟକ୍ରମେ ପ୍ରକଳ୍ପଗୁଡ଼ିକ ସମ୍ପୂର୍ଣ୍ଣ ହେବ। ଏବେ ଦେଖିବାକୁ ବାକି ରହିଲା— କଳାହାଣ୍ଡିର ବିକାଶ ଫଳକରୁ ବାହାରି ଲୋକଙ୍କ ଘରଦ୍ୱାରକୁ କେବେ ପହଞ୍ଚୁଛି।
Thanks for reading: କଳାହାଣ୍ଡି ପାଇଁ ଶତାଧିକ କୋଟିର ବିକାଶ ପ୍ରକଳ୍ପ; ଘୋଷଣା ବେଶି, ଫଳ କେବେ?, Sorry, my English is bad:)