ଭବାନୀପାଟଣା, ୮ ନଭେମ୍ବର ୨୦୨୬ | ସିଂହନାଦ (SIMHANAAD)
ଆଜି ସାରା ଦେଶରେ ପାଳିତ ହେଉଛି ଆଲୋକର ପର୍ବ ଦୀପାବଳି। ଘରେ ଘରେ ଦୀପ ଜଳିବ, ଆକାଶ ଆଲୋକିତ ହେବ, ବଜାରରେ ଉତ୍ସବର ମାହୋଲ ଦେଖିବାକୁ ମିଳିବ। କିନ୍ତୁ ଏହି ଆଲୋକର ଉତ୍ସବ ମଧ୍ୟରେ ଆମ ସମାଜ ନିଜକୁ ଥରେ ପ୍ରଶ୍ନ କରିବା ଆବଶ୍ୟକ—ଆମ ପାଖରେ ଥିବା ଅସହାୟ, ଗରିବ ଓ ବିପନ୍ନ ପରିବାରଙ୍କ ଜୀବନରେ କ'ଣ ଆଜି ଆଲୋକ ପହଞ୍ଚିଛି?
ଚଳିତ ବର୍ଷ ଘୂର୍ଣ୍ଣିଝଡ଼ ଓ ପରବର୍ତ୍ତୀ ବନ୍ୟାରେ ଓଡ଼ିଶାର କେତେକ ଅଞ୍ଚଳରେ ଲୋକେ କ୍ଷୟକ୍ଷତି ଓ ଦୁର୍ଦ୍ଦଶାର ସମ୍ମୁଖୀନ ହୋଇଛନ୍ତି। ଏପରି ସମୟରେ ରାଜ୍ୟର ମୁଖ୍ୟମନ୍ତ୍ରୀ ଓ ବିରୋଧୀ ଦଳ ନେତା ମଧ୍ୟ ବିପନ୍ନଙ୍କ ପ୍ରତି ସମବେଦନା ଜଣାଇ ନିଜ ଦୀପାବଳି ଉତ୍ସବ ପାଳନ ନକରିବାର ନିଷ୍ପତ୍ତି ନେଇଥିବା ଖବର ସାମ୍ନାକୁ ଆସିଛି।
କେବଳ ବାଣ ଫୁଟାଇଲେ ଅନ୍ଧକାର ଦୂର ହୁଏ ନାହିଁ!
ଦୀପାବଳିର ଅର୍ଥ କେବଳ ନୂଆ ପୋଷାକ, ମିଠା, ଆଲୋକସଜ୍ଜା ଓ ଆତସବାଜି ନୁହେଁ। ଯେଉଁ ଘରେ ଦୁଇବେଳା ଖାଦ୍ୟ ଯୋଗାଡ଼ କରିବା କଷ୍ଟକର, ଯେଉଁ ପରିବାର ଆର୍ଥିକ ସଂକଟରେ ଦିନ କାଟୁଛନ୍ତି, ଯେଉଁ ବୃଦ୍ଧ ଓ ଅସହାୟଙ୍କ ପାଖରେ କେହି ନାହାନ୍ତି—ସେମାନଙ୍କ ପାଇଁ ଆମ ଉତ୍ସବରେ ସାମାନ୍ୟ ସହଯୋଗ ହିଁ ହୋଇପାରେ ପ୍ରକୃତ ଦୀପାବଳି।
ପ୍ରଶାସନ ଓ ନାଗରିକଙ୍କ ପାଇଁ ମଧ୍ୟ ରହିଛି ଦାୟିତ୍ୱ।
ଦୀପାବଳିରେ ବାୟୁ ଓ ଶବ୍ଦ ପ୍ରଦୂଷଣ ନିୟନ୍ତ୍ରଣ, ଅଗ୍ନିକାଣ୍ଡ ରୋକିବା, ଶିଶୁ, ବୃଦ୍ଧ, ରୋଗୀ ଓ ପଶୁପକ୍ଷୀଙ୍କ ସୁରକ୍ଷା ପ୍ରତି ସମସ୍ତେ ସଚେତନ ହେବା ଜରୁରୀ। ଓଡ଼ିଶାରେ ନିର୍ଦ୍ଦେଶାନୁସାରେ କେବଳ ଅନୁମୋଦିତ ସବୁଜ ବାଣ ରାତି ୭ଟାରୁ ୯ଟା ମଧ୍ୟରେ ଫୁଟାଇବାକୁ କୁହାଯାଇଛି।
ଆଜିର ଦିନରେ ଆସନ୍ତୁ ସଂକଳ୍ପ ନେବା—ଅନ୍ୟର ଦୁଃଖ ଉପରେ ନିଜ ଖୁସିର ମହଲ ନିର୍ମାଣ କରିବା ନାହିଁ। ଆଡ଼ମ୍ବର ଅପେକ୍ଷା ମାନବିକତାକୁ ଅଧିକ ଗୁରୁତ୍ୱ ଦେବା।
ସିଂହନାଦର ସ୍ପଷ୍ଟ ଆହ୍ୱାନ:
ଦୀପ ଜାଳନ୍ତୁ, କିନ୍ତୁ କାହାର ଜୀବନରେ ଅନ୍ଧକାର ସୃଷ୍ଟି କରନ୍ତୁ ନାହିଁ। ବାଣର ଶବ୍ଦରେ ନୁହେଁ, ମାନବିକତାର କାର୍ଯ୍ୟରେ ନିଜ ପରିଚୟ ସୃଷ୍ଟି କରନ୍ତୁ।
କାରଣ ପ୍ରକୃତ ଦୀପାବଳି ସେତେବେଳେ ସାର୍ଥକ ହେବ, ଯେତେବେଳେ ସମାଜର ଶେଷ ଧାଡ଼ିରେ ଥିବା ମଣିଷଟିଏ ମଧ୍ୟ ହସିପାରିବ।
ସମସ୍ତଙ୍କୁ ମାନବିକତା, ଶାନ୍ତି ଓ ସଦ୍ଭାବନାର ଦୀପାବଳିର ଶୁଭେଚ୍ଛା।
ଜୟ ମା ମାଣିକେଶ୍ୱରୀ। ଜୟ ସିଂହନାଦ।
Thanks for reading: ଆଲୋକର ପର୍ବରେ ଅନ୍ଧାରରେ ଅନେକ ଜୀବନ! ଦୀପାବଳି କେବଳ ଆଡ଼ମ୍ବର ନୁହେଁ, ମାନବିକତାର ପରୀକ୍ଷା, Sorry, my English is bad:)