ଭୁବନେଶ୍ୱର, ୫ ଅକ୍ଟୋବର ୨୦୨୬, ସିଂହନାଦ (SIMHANAAD): ପାର୍ବଣ ପୂର୍ବରୁ ଓଡ଼ିଶାରେ ବେଆଇନ ମଦ, ଗଞ୍ଜେଇ ଓ ଅନ୍ୟାନ୍ୟ ନିଶା କାରବାର ବିରୋଧରେ ‘ଦମନ’ ଅଭିଯାନ ଜୋରଦାର ହୋଇଛି। ଚଢ଼ାଉ ବେଳେ ୮.୧୩ ଟନ୍ରୁ ଅଧିକ ଗଞ୍ଜେଇ ଓ ବିପୁଳ ପରିମାଣର ବେଆଇନ ମଦ ଜବତ ହୋଇଥିବା ଜଣାପଡ଼ିଛି। ଏକାଧିକ ମାମଲା ରୁଜୁ ସହ ଗିରଫଦାରୀ ମଧ୍ୟ ହୋଇଛି।
କାଗଜରେ ଦେଖିଲେ ଅଭିଯାନର ସଫଳତାର ତାଲିକା ଲମ୍ବା। ଗଞ୍ଜେଇ ଜବତ, ମଦ ଜବତ, ମାମଲା ରୁଜୁ, ଗିରଫ—ସବୁ କିଛି ଚାଲିଛି। କିନ୍ତୁ ଏଠି ହିଁ ଗୋଟିଏ ସରଳ ପ୍ରଶ୍ନ ଉଠୁଛି—ଯଦି ନିଶା କାରବାର ଏତେ ବଡ଼ ଆକାରରେ ଚାଲିଛି, ତେବେ ଏହାର ମୁଖ୍ୟ କାର୍ପଟଦାର କେଉଁଠି?
ଛୋଟ ବେପାରୀ ଧରାପଡ଼ିଲେ ମଧ୍ୟ ଯଦି ଚୋରାଚାଲାଣର ମୁଖ୍ୟ ରାସ୍ତା ଖୋଲା ରହିଯାଏ, ତେବେ ଗୋଟିଏ ଚାଲାଣ ଧରାପଡ଼ିବ, ଆଉ ଗୋଟିଏ ଚାଲାଣ ବଜାରକୁ ପହଞ୍ଚିଯିବ। ତେଣୁ କେବଳ ଜବତ ଓ ଗିରଫର ସଂଖ୍ୟା ନୁହେଁ, ନିଶାର ମୂଳ ଯୋଗାଣ ଶୃଙ୍ଖଳ ଓ ଆର୍ଥିକ ନେଟୱର୍କ ଉପରେ କେତେ ଦୂର କାର୍ଯ୍ୟାନୁଷ୍ଠାନ ହେଲା—ସେଥି ମଧ୍ୟ ଗୁରୁତ୍ୱପୂର୍ଣ୍ଣ।
ବ୍ୟଙ୍ଗରେ କହିଲେ—ନିଶା ବେପାରୀଙ୍କୁ ଧରିବା ପାଇଁ ଅଭିଯାନ ଚାଲିଛି, କିନ୍ତୁ ନିଶା କାରବାର ମଧ୍ୟ ନିଜ ଗତିରେ ‘ଅଭିଯାନ’ ଚଳାଉଛି! ଆଜି ଜବତର ଖବର, କାଲି ପୁଣି ନୂଆ ଚାଲାଣ—ଏହି ଚକ୍ର କେବେ ଭାଙ୍ଗିବ?
‘ଦମନ’ ଅଭିଯାନ ଯଦି ନିୟମିତ ଓ ନିରପେକ୍ଷ ଭାବେ ଚାଲିବା ସହ ନିଶା କାରବାରର ମୂଳ ନେଟୱର୍କ ପର୍ଯ୍ୟନ୍ତ ପହଞ୍ଚେ, ତେବେ ଏହାର ପ୍ରଭାବ ଦୀର୍ଘସ୍ଥାୟୀ ହୋଇପାରିବ। ନଚେତ ଜବତର ତାଲିକା ବଢ଼ିବ, ମାମଲାର ସଂଖ୍ୟା ବଢ଼ିବ—କିନ୍ତୁ ନିଶାର ବଜାର କେତେ କମିଲା, ସେହି ପ୍ରଶ୍ନ ଅନୁତ୍ତରିତ ରହିଯିବ।
ନିଶାମୁକ୍ତ ଓଡ଼ିଶା ପାଇଁ ଦରକାର କେବଳ ‘ଦମନ’ ନୁହେଁ—ଦରକାର ମୂଳକୁ ଧରିବାର ଦୃଢ଼ ଅଭିଯାନ।
Thanks for reading: ଦମନ ଅଭିଯାନରେ ଧରାପଡ଼ୁଛି ନିଶାର ପାହାଡ଼; ତଥାପି ଥମୁନି କାରବାର!, Sorry, my English is bad:)