ଭୁବନେଶ୍ୱର, ୬ ଅଗଷ୍ଟ | SIMHANAAD: ଓଡ଼ିଶାର ସରକାରୀ ବିଦ୍ୟାଳୟଗୁଡ଼ିକ ଡିଜିଟାଲ୍ ଶିକ୍ଷା ଦିଗରେ ଦ୍ରୁତ ଅଗ୍ରସର ହେଉଛି। ରାଜ୍ୟସଭାରେ କେନ୍ଦ୍ର ସରକାର ଦେଇଥିବା ତଥ୍ୟ ଅନୁଯାୟୀ, ରାଜ୍ୟର ପ୍ରାୟ ୮୨ ପ୍ରତିଶତ ସରକାରୀ ବିଦ୍ୟାଳୟରେ ଏବେ ଇଣ୍ଟରନେଟ୍ ସଂଯୋଗ ଉପଲବ୍ଧ। କେନ୍ଦ୍ର ଶିକ୍ଷା ରାଜ୍ୟମନ୍ତ୍ରୀ ଜୟନ୍ତ ଚୌଧୁରୀ ରାଜ୍ୟସଭାରେ ଲିଖିତ ଉତ୍ତରରେ ଏହି ସୂଚନା ଦେଇଛନ୍ତି।
ସରକାରୀ ତଥ୍ୟ ଅନୁସାରେ, ଓଡ଼ିଶାର ୪୬,୮୦୧ଟି ସରକାରୀ ବିଦ୍ୟାଳୟ ମଧ୍ୟରୁ ୩୮,୭୪୮ଟିରେ ଇଣ୍ଟରନେଟ୍ ସୁବିଧା ରହିଛି। ଏହା ଅନଲାଇନ୍ ଶିକ୍ଷା, ସ୍ମାର୍ଟ କ୍ଲାସ୍ରୁମ୍ ଏବଂ ଡିଜିଟାଲ୍ ଶିକ୍ଷଣ ବ୍ୟବସ୍ଥାକୁ ଆହୁରି ସୁଦୃଢ଼ କରିବାରେ ସହାୟକ ହେବ ବୋଲି ଆଶା କରାଯାଉଛି।
ଏହାଛଡ଼ା ରାଜ୍ୟର ୪୬,୬୮୯ଟି ବିଦ୍ୟାଳୟରେ ଶୌଚାଳୟ, ୪୬,୭୯୮ଟିରେ ପାନୀୟ ଜଳ, ୪୬,୬୬୭ଟିରେ ବିଦ୍ୟୁତ୍ ସଂଯୋଗ ଏବଂ ୪୩,୪୫୨ଟି ବିଦ୍ୟାଳୟରେ ପ୍ରାଚୀର ଥିବା ସୂଚନା ମଧ୍ୟ କେନ୍ଦ୍ର ସରକାର ଦେଇଛନ୍ତି। ରାଜ୍ୟରେ ମୋଟ ୧,୯୪,୮୪୦ଟି ଶ୍ରେଣୀଗୃହ ରହିଛି।
କେନ୍ଦ୍ର ସରକାର ସ୍ପଷ୍ଟ କରିଛନ୍ତି ଯେ, ଶିକ୍ଷା ସମବର୍ତ୍ତୀ ତାଲିକାର ବିଷୟ ହୋଇଥିବାରୁ ବିଦ୍ୟାଳୟ ପରିଚାଳନାର ପ୍ରମୁଖ ଦାୟିତ୍ୱ ରାଜ୍ୟ ସରକାରଙ୍କର। ତେବେ 'ସମଗ୍ର ଶିକ୍ଷା' ଯୋଜନା ମାଧ୍ୟମରେ କେନ୍ଦ୍ର ପକ୍ଷରୁ ନୂଆ ଶ୍ରେଣୀଗୃହ, କମ୍ପ୍ୟୁଟର ଲ୍ୟାବ୍, ବିଜ୍ଞାନ ଲ୍ୟାବ୍, ପୁସ୍ତକାଳୟ, ପାନୀୟ ଜଳ, ବିଦ୍ୟୁତ୍, ରାମ୍ପ ଓ ଅନ୍ୟାନ୍ୟ ଭିତ୍ତିଭୂମି ବିକାଶ ପାଇଁ ସହାୟତା ଯୋଗାଇ ଦିଆଯାଉଛି।
ଡିଜିଟାଲ୍ ଶିକ୍ଷାକୁ ଗ୍ରାମାଞ୍ଚଳରେ ପହଞ୍ଚାଇବା ଦିଗରେ ଏହି ଅଗ୍ରଗତି ଆଗାମୀ ଦିନରେ ଛାତ୍ରଛାତ୍ରୀଙ୍କୁ ଆଧୁନିକ ଶିକ୍ଷା ସହ ଯୋଡ଼ିବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଶିକ୍ଷା କ୍ଷେତ୍ରରେ ମତ ପ୍ରକାଶ ପାଉଛି।
Thanks for reading: ଓଡ଼ିଶାର ଶିକ୍ଷା କ୍ଷେତ୍ରରେ ଡିଜିଟାଲ୍ ବିପ୍ଳବ: ୮୨% ସରକାରୀ ବିଦ୍ୟାଳୟରେ ପହଞ୍ଚିଲା ଇଣ୍ଟରନେଟ୍ ସୁବିଧା, Sorry, my English is bad:)