ଭବାନୀପାଟଣା, ୩୧/୮: କଳାହାଣ୍ଡି ମାଟିରୁ ଉଠିଥିବା ଓଡ଼ିଆ ସାହିତ୍ୟର ସ୍ୱର ଏବେ ବିଶ୍ୱର ଆହୁରି ତିନିଟି ଭାଷାରେ ପହଞ୍ଚିଛି। ବିଶିଷ୍ଟ ଶିକ୍ଷାବିତ୍ ଓ ସାହିତ୍ୟିକ ଡ. ଭବାନୀ ଶଙ୍କର ନିଆଲଙ୍କ ଚର୍ଚ୍ଚିତ କବିତା ‘ପ୍ରେମରେ’ ଗ୍ରୀକ୍, ସ୍ପେନିସ୍ ଓ ଫରାସୀ ଭାଷାରେ ଅନୁଦିତ ହୋଇଛି। ଆନ୍ତର୍ଜାତୀୟ ଖ୍ୟାତିସମ୍ପନ୍ନ ପ୍ରଫେସର ଆଇରିନ୍ ଡୁରା-କାଭାଡିଆ ଏହି ଅନୁବାଦ କରିଥିବା ସୂଚନା ମିଳିଛି।
ଡ. ନିଆଲଙ୍କ ଏହି ସଫଳତା କେବଳ ଜଣେ କବିଙ୍କ ସଫଳତା ନୁହେଁ, ବରଂ କଳାହାଣ୍ଡିର ସାହିତ୍ୟିକ ପରିଚୟକୁ ବିଶ୍ୱ ଦରବାରରେ ଆହୁରି ମଜବୁତ କରିବାର ଏକ ବଡ଼ ପଦକ୍ଷେପ ବୋଲି ସାହିତ୍ୟ ମହଲରେ ଚର୍ଚ୍ଚା ହେଉଛି।
ପ୍ରଫେସର ଆଇରିନ୍ ଡୁରା-କାଭାଡିଆ ଏକାଡେମୀ ଲାଙ୍ଗୁଏଜ୍ ସେଣ୍ଟରର ପ୍ରିନ୍ସିପାଲ୍/ସିଇଓ, ରାଇଟର୍ସ କ୍ୟାପିଟାଲ୍ ଇଣ୍ଟରନ୍ୟାସନାଲ୍ ଫାଉଣ୍ଡେସନର ମହାସଚିବ ଏବଂ ରାଇଟର୍ସ ଇଣ୍ଟରନ୍ୟାସନାଲ୍ ଏଡିସନର ମୁଖ୍ୟ ସମ୍ପାଦିକା ଭାବେ ଜଡ଼ିତ ଅଛନ୍ତି।
ସୂଚନା ଅନୁଯାୟୀ, ଡ. ନିଆଲଙ୍କ କବିତାଗୁଡ଼ିକ ଏପର୍ଯ୍ୟନ୍ତ ୨୬ଟି ଭାଷାରେ ଅନୁଦିତ ହୋଇସାରିଛି। ଓଡ଼ିଆ ଭାଷାର ସୃଜନଶୀଳତାକୁ ବିଶ୍ୱର ବିଭିନ୍ନ ଭାଷାଭାଷୀ ପାଠକଙ୍କ ନିକଟରେ ପହଞ୍ଚାଇବାରେ ଏହା ଏକ ଉଲ୍ଲେଖନୀୟ ସାହିତ୍ୟିକ ସଫଳତା।
କଳାହାଣ୍ଡିର ମାଟିରୁ ଉଠିଥିବା କବିତା ଯେତେବେଳେ ବିଶ୍ୱର ଭାଷାରେ କଥା କହେ, ସେତେବେଳେ ଏହା କେବଳ ସାହିତ୍ୟ ନୁହେଁ—ଏହା କଳାହାଣ୍ଡିର ସୃଜନଶୀଳ ପରିଚୟର ବିଶ୍ୱମଞ୍ଚରେ ଏକ ଦୃଢ଼ ଉପସ୍ଥିତି।
ସିଂହନାଦ | SIMHANAAD NEWS
Thanks for reading: କଳାହାଣ୍ଡିର କଲମରେ ବିଶ୍ୱଜୟ! ଡ. ଭବାନୀ ଶଙ୍କର ନିଆଲଙ୍କ ‘ପ୍ରେମରେ’ ଏବେ ୩ ବିଦେଶୀ ଭାଷାରେ, Sorry, my English is bad:)