ଭୁବନେଶ୍ୱର | ୨ ଅଗଷ୍ଟ ୨୦୨୬ | ସିଂହନାଦ
ନିଶାଦ୍ରବ୍ୟଠାରୁ ଦୂରେଇ ରହି ନିଶାମୁକ୍ତ ଭାରତ ଗଠନରେ ଯୁବପିଢ଼ି ନେତୃତ୍ୱ ନେବା ଆବଶ୍ୟକ ବୋଲି ଓଡ଼ିଶାର ରାଜ୍ୟପାଳ ଡ. ହରି ବାବୁ କମ୍ଭମ୍ପାଟି ଆହ୍ୱାନ ଦେଇଛନ୍ତି। ଭୁବନେଶ୍ୱରରେ ‘ନଶାମୁକ୍ତ ଯୁବା–ବିକଶିତ ଭାରତ ସଙ୍କଳ୍ପ ଅଭିଯାନ’ କାର୍ଯ୍ୟକ୍ରମରେ ଯୋଗଦେଇ ସେ କହିଛନ୍ତି ଯେ ନିଶାରେ ଜଡ଼ିତ ହୋଇ ଜଣେ ଯୁବକ ନିଜ ଜୀବନରୁ ଦୂରେଇଯିବା କେବଳ ବ୍ୟକ୍ତିଗତ କ୍ଷତି ନୁହେଁ, ଏହା ଦେଶ ପାଇଁ ମଧ୍ୟ ଏକ ବଡ଼ କ୍ଷତି।
ନିଶା ବିରୋଧରେ ଓଡ଼ିଶାରେ ବଡ଼ ଅଭିଯାନ
ନିଶାମୁକ୍ତ ଯୁବା ଗଠନ ଲକ୍ଷ୍ୟରେ ଓଡ଼ିଶା ସରକାର ଏହି ଅଭିଯାନକୁ ଏକ ବ୍ୟାପକ ସାମାଜିକ ଆନ୍ଦୋଳନର ରୂପ ଦେବାକୁ ପଦକ୍ଷେପ ନେଇଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଅଭିଯାନକୁ ୧୦୦ ସପ୍ତାହ ଧରି ଚଳାଇବା ନେଇ ଘୋଷଣା କରିଛନ୍ତି।
ନିଶା କାରବାର ବିରୋଧରେ ‘ଜିରୋ ଟଲରେନ୍ସ’
ସରକାରଙ୍କ ପକ୍ଷରୁ ନିଶା କାରବାର ଓ ବେଆଇନ ଗଞ୍ଜେଇ ଚାଷ ବିରୋଧରେ କଡ଼ା ପଦକ୍ଷେପ ନିଆଯାଉଥିବା କୁହାଯାଇଛି। ଉପଲବ୍ଧ ରିପୋର୍ଟ ଅନୁସାରେ, ଜୁଲାଇ ୨୦୨୪ରୁ ଜୁନ୍ ୨୦୨୬ ମଧ୍ୟରେ ଓଡ଼ିଶା ପୁଲିସ ୬୩,୭୨୦ ଏକର ଅଞ୍ଚଳରେ ଥିବା ବେଆଇନ ଗଞ୍ଜେଇ ଚାଷ ନଷ୍ଟ କରିଥିବା ଏବଂ ୪୩୨ ଟନ୍ ଗଞ୍ଜେଇ ଜବତ କରିଥିବା ମୁଖ୍ୟମନ୍ତ୍ରୀ କହିଛନ୍ତି। ଏହି ସମୟରେ ୨,୫୭୬ଟି ମାମଲା ରୁଜୁ ଓ ୩,୬୯୯ ଜଣଙ୍କୁ ଗିରଫ କରାଯାଇଥିବା ମଧ୍ୟ ରିପୋର୍ଟରେ ଉଲ୍ଲେଖ ରହିଛି।
ଯୁବପିଢ଼ି ହେବେ ପରିବର୍ତ୍ତନର ମୁଖ୍ୟ ଶକ୍ତି
ରାଜ୍ୟପାଳ ଯୁବପିଢ଼ିଙ୍କୁ ନିଶାଠାରୁ ଦୂରେଇ ରହି ଶିକ୍ଷା, କ୍ରୀଡ଼ା, ଦକ୍ଷତା ବିକାଶ ଓ ସୃଜନଶୀଳ କାର୍ଯ୍ୟରେ ନିଜକୁ ନିୟୋଜିତ କରିବାକୁ ଆହ୍ୱାନ ଦେଇଛନ୍ତି। ସୁସ୍ଥ, ଶୃଙ୍ଖଳିତ ଓ ଦାୟିତ୍ୱବାନ ଯୁବପିଢ଼ି ହିଁ ବିକଶିତ ଭାରତର ମୂଳ ଶକ୍ତି ବୋଲି ସେ ଗୁରୁତ୍ୱାରୋପ କରିଛନ୍ତି।
Thanks for reading: ନିଶାକୁ ‘ନା’ କହିବା ହେଉଛି ମାତୃଭୂମି ପ୍ରତି ପ୍ରତିବଦ୍ଧତା: ରାଜ୍ୟପାଳ, Sorry, my English is bad:)