ଭୁବନେଶ୍ୱର, ୧୨ ଜୁଲାଇ (ସିଂହନାଦ): ଓଡ଼ିଶାରେ ପ୍ରାଥମିକ ଶିକ୍ଷାର ବିକାଶ ଦିଗରେ ରାଜ୍ୟ ସରକାର ଏକ ବଡ଼ ପଦକ୍ଷେପ ନେଇଛନ୍ତି। ରାଜ୍ୟ କ୍ୟାବିନେଟ୍ ୬୭ଟି ପ୍ରାଥମିକ ବିଦ୍ୟାଳୟକୁ ଉଚ୍ଚ ପ୍ରାଥମିକ ସ୍ତରକୁ ଉନ୍ନତ କରିବା ପ୍ରସ୍ତାବକୁ ମଞ୍ଜୁରି ଦେଇଛନ୍ତି। ଏହି ନିଷ୍ପତ୍ତି ଦ୍ୱାରା ଗ୍ରାମାଞ୍ଚଳର ହଜାର ହଜାର ଛାତ୍ରଛାତ୍ରୀ ନିଜ ଅଞ୍ଚଳରେ ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠପଢ଼ାର ସୁବିଧା ପାଇପାରିବେ।
ସରକାରୀ ସୂଚନା ଅନୁଯାୟୀ, ଏହି ୬୭ଟି ବିଦ୍ୟାଳୟ ମଧ୍ୟରେ ବରଗଡ଼ ଜିଲ୍ଲାର ୭ଟି ପ୍ରାଥମିକ ବିଦ୍ୟାଳୟ ସାମିଲ ହୋଇଛି। ବିଦ୍ୟାଳୟଗୁଡ଼ିକରେ ଅତିରିକ୍ତ ଶ୍ରେଣୀକକ୍ଷ, ଶିକ୍ଷକ ନିଯୁକ୍ତି ଓ ଆବଶ୍ୟକ ଭିତ୍ତିଭୂମି ସୁବିଧା ବିକାଶ ଉପରେ ସରକାର ଗୁରୁତ୍ୱ ଦେବେ।
ଏହି ନିଷ୍ପତ୍ତି ପରେ ଛାତ୍ରଛାତ୍ରୀଙ୍କୁ ଉଚ୍ଚ ପ୍ରାଥମିକ ଶିକ୍ଷା ପାଇଁ ଦୂରବର୍ତ୍ତୀ ବିଦ୍ୟାଳୟକୁ ଯିବାର ଆବଶ୍ୟକତା କମିବ। ବିଶେଷକରି ଆର୍ଥିକ ଭାବେ ପଛୁଆ ଓ ଗ୍ରାମାଞ୍ଚଳର ପରିବାରମାନେ ଏଥିରୁ ଉପକୃତ ହେବେ ବୋଲି ଆଶା କରାଯାଉଛି।
ଶିକ୍ଷା କ୍ଷେତ୍ରରେ ସମାନ ସୁଯୋଗ ସୃଷ୍ଟି କରିବା ଏବଂ ବିଦ୍ୟାଳୟ ଛାଡ଼ୁଥିବା ଛାତ୍ରଛାତ୍ରୀଙ୍କ ସଂଖ୍ୟା ହ୍ରାସ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଶିକ୍ଷାବିତ୍ମାନେ ମତ ପ୍ରକାଶ କରିଛନ୍ତି।
Thanks for reading: ଶିକ୍ଷା କ୍ଷେତ୍ରରେ ବଡ଼ ନିଷ୍ପତ୍ତି: ରାଜ୍ୟର ୬୭ଟି ପ୍ରାଥମିକ ବିଦ୍ୟାଳୟ ହେବ ଉଚ୍ଚ ପ୍ରାଥମିକ, ବରଗଡ଼ର ୭ଟି ସ୍କୁଲ ସାମିଲ, Sorry, my English is bad:)