ଭବାନୀପାଟଣା, ୧୮ ଜୁଲାଇ (ସିଂହନାଦ):ଯେଉଁ କଳାହାଣ୍ଡିକୁ କେବେ କେବେ କେବଳ ଦାରିଦ୍ର୍ୟ ଓ ପଛୁଆ ଜିଲ୍ଲା ଭାବେ ଦେଖାଯାଏ, ସେହି ମାଟିର ସନ୍ତାନ ଆଜି ବିଶ୍ୱ କ୍ରୀଡ଼ା ମଞ୍ଚରେ ଭାରତର ତ୍ରିରଙ୍ଗାକୁ ଗର୍ବର ସହ ଉଡ଼ାଇ ନୂଆ ଇତିହାସ ରଚିଛନ୍ତି। କଳାହାଣ୍ଡିର ଯୁବ ପାରା ବ୍ୟାଡମିଣ୍ଟନ ତାରକା ଆକାଶ ରଞ୍ଜନ ମୁଣ୍ଡ ବିଶ୍ୱ ଏବିଲିଟିସ୍ପୋର୍ଟ ୟୁଥ ଗେମ୍ସ–୨୦୨୬ରେ ଦମଦାର ପ୍ରଦର୍ଶନ କରି ୨ଟି ସ୍ୱର୍ଣ୍ଣ ଓ ୧ଟି ରୌପ୍ୟ ପଦକ ହାସଲ କରିଛନ୍ତି।
ପୁରୁଷ ସିଙ୍ଗଲ୍ସରେ ପ୍ରତିଦ୍ୱନ୍ଦ୍ୱୀଙ୍କୁ ପଛରେ ପକାଇ ସ୍ୱର୍ଣ୍ଣ ଜିତିବା ପରେ ମିକ୍ସଡ୍ ଡବଲ୍ସରେ ମଧ୍ୟ ସ୍ୱର୍ଣ୍ଣ ପଦକ ହାସଲ କରିଥିଲେ। ଏହା ସହ ପୁରୁଷ ଡବଲ୍ସରେ ରୌପ୍ୟ ପଦକ ଜିତି ମୋଟ ତିନୋଟି ପଦକ ସହ ଭାରତ ପାଇଁ ଗୌରବ ଆଣିଛନ୍ତି। ଏହି ସଫଳତା କେବଳ ବ୍ୟକ୍ତିଗତ ବିଜୟ ନୁହେଁ, ବରଂ କଳାହାଣ୍ଡିର ଯୁବ ଶକ୍ତି ଓ ଓଡ଼ିଶାର କ୍ରୀଡ଼ା ସାମର୍ଥ୍ୟର ଏକ ଦୃଢ଼ ପରିଚୟ।
ଆକାଶଙ୍କ ଏହି ଅପୂର୍ବ ସଫଳତା ପରେ କଳାହାଣ୍ଡିରେ ଖୁସିର ମାହୋଲ ସୃଷ୍ଟି ହୋଇଛି। କ୍ରୀଡ଼ାପ୍ରେମୀ, ବିଭିନ୍ନ ସାମାଜିକ ସଂଗଠନ ଓ ଶୁଭେଚ୍ଛୁମାନେ ତାଙ୍କୁ ଅଭିନନ୍ଦନ ଜଣାଇଛନ୍ତି। ଜିଲ୍ଲାର ଯୁବପିଢ଼ି ପାଇଁ ସେ ଏବେ ପ୍ରେରଣାର ଏକ ନୂଆ ପ୍ରତୀକ।
ଏହି ବିଜୟ ପୁଣିଥରେ ପ୍ରମାଣ କରିଛି—ସୁଯୋଗ, ପରିଶ୍ରମ ଓ ଦୃଢ଼ ସଂକଳ୍ପ ଥିଲେ କଳାହାଣ୍ଡିର ମାଟିରୁ ମଧ୍ୟ ବିଶ୍ୱ ବିଜେତା ଜନ୍ମ ନେଇପାରନ୍ତି। ଆକାଶ ରଞ୍ଜନ ମୁଣ୍ଡଙ୍କ ଏହି ସଫଳତା ଆଗାମୀ ପିଢ଼ିର କ୍ରୀଡ଼ାବିତ୍ମାନଙ୍କ ପାଇଁ ଏକ ଉଜ୍ଜ୍ୱଳ ପଥପ୍ରଦର୍ଶକ ହୋଇ ରହିବ।
Thanks for reading: ବିଶ୍ୱ ମଞ୍ଚରେ କଳାହାଣ୍ଡିର ସିଂହଗର୍ଜନ! ୨ ସ୍ୱର୍ଣ୍ଣ, ୧ ରୌପ୍ୟ ଜିତି ଇତିହାସ ରଚିଲେ ଆକାଶ ରଞ୍ଜନ ମୁଣ୍ଡ, Sorry, my English is bad:)